起底組，聽日就上映嘞。
外人睇落平平無奇嘅一套港產片，係我人生最重要嘅一個分叉。我係一個非常非常門外漢嘅電影工作者，門外漢到極其量係乜嘢戲都唔介意睇，門外漢到連朋友都會隱隱傳出「吓，你都做到導演」，門外漢到我除咗喜歡，其實我無太多電影嘅專業知識。
呢個問題，喺大家未知道前，我自己就已經知道。
不過我係網絡走出嚟，一個本校中三都未正規完成，就打交打到踢出校嘅人，因為一次機會學人勤力一次冒險一次，最後出到一本書，改編過電影，遊歷過歐洲影展，個世界仲有咩無可能？
選角時，我有諗過，第一次就拍鄧麗欣呢個問題。由「男人唔可以窮」時嘅張以娜就認識，講唔上深交但總算係熟人，我自己第一次拍戲如果攬炒，攬炒一個熟人好似唔係幾好意思，不過最後我都係用盡心機去做，金牛座無咩安全感，片場多個熟人安心好多，無咁淆底。
其他演員for我都係新相識，阿修會比較熟，但球場上嘅幾腳友誼，唔會真係建立到乜嘢，反正呢年幾嘅合作同友誼，多謝幾位演員幫我留低過呢一筆，我今早真係學到好多嘢。
下面有張相，帶眼鏡係編劇沈錫然先生，成個韓仔咁嘅係譚運佳先生。偉大航道起步就遇到呢兩個伙伴，大家一切都在心中。
經過咗十九個月，聽日終於上畫。香港戲一如以往，排片唔會太大優勢，但如果做到「逆流大叔」或者「非同凡響」嘅迴響，後勁先可以保住場次，無場次，一切都再無作用。
「起底組」頭一個星期嘅入座最重要，希望大家可以多多入場支持，睇完上網講幾句，讚好彈好，都感激不盡。
多謝大家。
Search